أخر الاخبار

افاق ما بعد الباكالوريا قطاع البناء و الهندسة المعمارية : ENA-INAU-ISTP-ISTA

سلسلة افاق ما بعد الباكالوريا قطاع البناء و الهندسة المعمارية

افاق ما بعد الباكالوريا قطاع البناء و الهندسة المعمارية : ENA-INAU-ISTP-ISTA


سلسلة افاق ما بعد الباكالوريا، موجهة لتلاميذ السنة الثانية من سلك الباكالوريا،جميع الشعب، في هذا الموضوع سنتطرق لافاق المدارس الخاصة بقطاع البناء و الهندسة المعمارية و يتعلق الامر ب:

1- المدرسة الوطنية للهندسة المعمارية ENA. 
2- المعهد الوطني للتهيئة و التعمير INAU . 
3- المعاهد المتخصصة للأشغال العمومية ISTP. 
4- المعاهد المتخصصة للتكنولوجيا التطبيقية ISTA . 

السلام عليكم تلاميذ و تلميذات السنة الثانية بكالوريا و مرحبا بيكم فالحلقة 3 من سلسلة الآفاق ما بعد البكالوريا لي غادي نتكلموا فيها على قطــاع البناء و الهندسة المعمارية نظرا لأنكم طلبتوه بزاف
البناء و الهندسة المعمارية كايتعتابر من بين أكثر المجالات المطلوبة فسوق الشغل فالمغرب 😉😉 داكشي علاش غادي نقدم ليكم 4 ديال المؤسسات العمومية لي يمكن الولوج إليها بعد الباك و التكوين فمجال البناء و الهندسة المعمارية :


1- المدرسة الوطنية للهندسة المعمارية ENA :

هي مدرسة كاتواجد فمدينة الرباط و عندها فروع فكل من مدينة مراكش و فاس و تطوان و أكـــادير كادوم فيها الدراسة 6 سنوات كاتسالي بالحصول على شهادة مهندس دولة (مهندس معماري)
ولوج هاد المدرسة كايتطلب بكالوريا علمية أو تقنية (PC - SVT - SM - ECO - ST ..) + تكون جايب 12 على الأقل فالإمتحان الجهوي ديال الأولى باك
التسجيل كايتم فقط عبر الأنترنيت + إيداع مصاريف دراسة الملف لي كاتبلغ 100 درهم
هناك إنتقاء أولي كايتم بناء على %75 وطني + %25 جهوي و عتبة الإنتقاء كاتتغير من سنة لأخرى ، فمثلا السنة الماضية كانت 15.88 ..، لي داز من الإنتقاء كايدوز للمرحلة الثانية ولي هي الإختبار الكتابي ولي دوزو مزيان راه كايدوز للمرحلة الأخيرة و لي هي الإختبار الشفوي

2- المعهد الوطني للتهيئة و التعمير INAU :

معهد كايتواجد فمدينة الرباط و كادوم فيه الدراسة 5 سنوات كاتسالي بالحصول على شهادة الماستر في التهيئة و التعمير لي كايكافئ ديبلوم مهندس دولة
كذلك الولوج كايتطلب بكالوريا علمية أو تقنية + شرط السن أن لا يتجاوز 21 سنة + تكون جايب 14 على الأقل فالجهوي و 14 على الأقل فالوطني
الإنتقاء الأولي كايتم بناء على المعدل العام للبكالوريا لي داز من الإنتقاء كايدوز للمرحلة الثانية ولي هي الإختبار الكتابي ولي دوزو مزيان راه كايدوز للمرحلة الأخيرة و لي هي الإختبار الشفوي

3- المعاهد المتخصصة للأشغال العمومية ISTP :

هي معاهد تابعة لوزارة التجهيز و النقل كاتواجد فكل من مدينة مراكش، وجدة فاس و أكادير ، كادوم فيها الدراسة سنتين كاتسالي بالحصول على ديبلوم التقني المتخصص فواحد من التخصصات لي كايوفرها المعهد بحال الهندسة المدنية ، الهيدروليك ، اللوجيستيك ...
ولوج هاد المعاهد كايتطلب بكالوريا علمية + شرط السن أن لا يتجاوز 23 سنة
التسجيل كايتم عن طريق إيداع ملف الترشيح مباشرة لدى المعهد أو ارساله عبر البريد
هناك إنتقاء أولي كايتم بناء على المعدل العام للبكالوريا و لي كايتراوح تقريبا ما بين 13.50 تال 15,50 على حسب التخصص و المدينة ، من بعد كاينة المرحلة الثانية لي هي الإختبار الكتابي و عاد كاتجي المرحلة الثالثة لي هي الإختبار الشفوي ...

4- المعاهد المتخصصة للتكنولوجيا التطبيقية ISTA :

هي معاهد تابعة لمكتب التكوين المهني و كايتواجد تقريبا فكل مدينة ، كادوم فيه الدراسة سنتين كاتسالي بالحصول على ديبلوم التقني المتخصص لي كايأهل لولوج سوق الشغل كتقني متخصص فواحد من التخصصات لي كايوفرها المعهد بحال الأشغال الكبرى Les gros œuvres - الأشغال العمومية Conducteur des travaux public .. ،
ولوج هاد التخصصات كايتطلب بكالوريا علمية ، كايكون إنتقاء فقط بدون مباراة
و للإشارة فبض المرات فاش كايكون الطلب كبير على هاد التخصصات راه كايديرو العتبة 12 فما فوق ، أما فاش ماكايكونش الطلب فراه بعض المرات كايكون ولوج مباشر .. ☺

نتمنى نكون قدمت ليكم بعض المعلومات المفيدة و مرحبا بالأسئلة ديالكم و الإستفسارات ديالكم على الكومنتيرات 🤗 و لي ماعندو حتا سؤال يقولينا شنو القطاع لي بغانا نهضرو عليه فالحلقة الرابعة إن شاء الله ؟

إسحاق غانم - مؤطر في التوجيه المدرسي و الجامعي


شاهد ايضا:



تعليقات
تعليق واحد
إرسال تعليق
  • Unknown
    Unknown 8/26/2021 02:46:00 م

    سلام عليكم عافاك بغيت نسولك واش ممكن نقرى الهندسة المعمارية فENA ومن بعد ندير التخصص فالتصميم الداخلي مع العلم أن الدراسة كادوم 6سنين فENA شحال مدة التخصص فالتصميم الداخلي بعد الحصول على ديبلوم مهندس دولة( معماري ) ؟؟ ولا حاجة أخرى شنو هما المدارس اللي ممكن مثلا تقرى نيشان التصميم الداخلي فيهم معلومات عليهم عافاك ؟؟ ومثلا واش ضروري تقرى الهندسة المعمارية ومن بعد دير التخصص فالتصميم الداخلي ولا تقدر دوز نيشان ؟؟ وأخر حاجة مكرهتش نعرف شي دومين كيجمع مابين التصميم الداخلي والتجارة في المغرب ecomercial interior design ؟؟

    إرسال ردحذف



    وضع القراءة :
    حجم الخط
    +
    16
    -
    تباعد السطور
    +
    2
    -